Maleman
Cing Ato
#TradisiBetawi
#MengiketBahaseNyengIlang
Dulu kalo malem ke-27 bulan Ramadan di musala ame mesjid pada ngadain maleman. Di musala penulis waktu ntu sering ngadain acara gituan waya ustaz masing idup, cuman sepeninggalnya kaga ada nyeng nerusin. Jadi ilang aja entuh acara maleman.
Emang waya ntu ustaz nyeng mimpin ame nyediain kue-kue, jamaeh ninggal gayemin doang. Nyeng ngikut cuman jemaeh kaki-laki doang, sementara empuan kaga pada idepan. Bocah-bocah pan kaga banyak, nyeng ngikut turut-turut orang situ aja, ntu juga cuman kumpi, engkong, ncang, mamang, ame tetangga. Orang endonan belum banyak kaya sekarang.
Idanganya cuman kurma, roti lapis ditutul pake sirop cap nanas pisang, ame pisang Lampung nyeng kecil-kecil entuh. Romanah enak aja entuh idangan di gayemin. Apalagi roti ditutul ame sirop udah mantep banget. Dulu kalo kaga ada roti lapis ame sirop, kayanya kurang afdol kalo lagi buka puasa.
Mangkanya dulu tukang roti pade muterin kampung nyabain rumah-rumah penduduk. Waya gini, udah jarang keiatan batang idungnya, mungkin udah banyak warung pada merotok di sunggal gang.
Acaranya cuman baca tahlilan ame doa doang, lalu gayemin idangan. Kelar maleman pada ninggalin musala, nyeng tinggal anak-anak muda nyeng pengen pade tadarusan. Anak-anak muda dulu emang tempat nongkrongnya musala atau mesjid.
Anak Betawi rata-rata pada bisa ngaji, kalo kaga bisa berarti orang tuanya kaga open ame agama atawa kaga pada salat apalagi ke musala.
Sekarang musala rada sepi kaga kaya dulu, bocah kurang demen tadarusan atawa lantaran kaga ada nyeng nua-nuain. Entuh bocah diantepin aja pengen tadarusan atawa kaga.
Nyeng dituain juga kaga open, kaga gregetan, kaga deket ame bocah-bocah. Ya, udah ntu bocah selagu-lagunya. Kalo lagi lempeng dia tadarusan, kalo lagi kumat dia pada keluyuran nyeng kaga karu-karuan.
Udah orang tuanya kaga open ame nyeng ngerti agama kaga open ame lingkungan, jadi deh, entuh bocah bukannya pada tadarusan, malahan pada tawuran.
Maleman entuh salah satu tradisi masyarakat Betawi. Banyak pelajaran nyeng dapat dipetik. Tentunya sebagai rasa syukur atas berbagei nikmat nyeng diberikan Allah SWT sehingga masing diberikan kesempetan pada malem ke-27. Kedua, berharap mendapatkan malem Lailatul Qadar. Malem nyeng diidam-idamin sama sunggal umat Islam di sunggal belahan dunia. Malem nyeng kalo dapetin entuh malem, balasannya sama ame ibadah sebanyak 1000 bulan atawa 83 taun.
Nyok, kite idupin lagi acara maleman!!!!
Cakung, April 2022
Cing Ato
Betawi Cakung
