Oblok
Cing Ato
Betawi Cakung
#TradisiBetawi
#GayemanBetawi
Oblok atau oblog merupakan salah satu makanan khas Betawi Cakung khususnya Kampung Baru Cakung. Kalo Betawi besonoan nyebutnya krebek.
Ampir tiap kegiatan rame-rame nyeng ngundang orang banyak, entuh oblok kaga ketinggalan, palagi kalo sedekahan ama kriyaan mesti entuh idangan isinya oblok disandingin ame semur jengkol. Pas lebaran juga kaga ketinggalan entuh nyak-nyak pada ngolahin oblok. Biasanya kalo udah dua ari digoreng garing aye gayemin kaga pake nasi, udah cetom aje dibuatnya.
Cuman gitu kalo abis gayemin idangan entuh tangan pada blepotan ama kuah oblok. Nyeng lucunya nyak baba kalo abis gayemin kaga pake cuci tangan dulu, cukup entuh jari diencotin ampe bersih. Baru deh entuh kobokan nyamperin. Maen celupin aje tuh tangan, udah entuh aer kobokan berubah warna jadi butek. Disosot dah tuh tangan pake bujur atawa topo, bahkan kadang disosot pake ujung kaen.
Biasanya oblok pake ikan nila/entog, bebek, sendalungan, tongki, dan ayam kampung. Nyeng paling sedep entuh ikan tongki mending dari nyeng laennya. Tongki entuh asal peranakan nila ama bebek. Mangkanya, perawakannya gede kaya nila dan panjangnya kaya bebek.
Dulu waya kecil sering miara bebek ame nila, kalo netes banyak banget anaknya. Resep aja liatinya kalo udah pada gede. Lah entuh baba kalo liat tongki udah pada jadi janggaran, udah ngajakin motong aja. Udah entuh miara bukan buat dijualin, tapi abis buat digayemin doang.
Palagi ikan oblok ditimpalin ama nasi uduk, bujug dah sedep banget. Saking resepnya gegares ampe kaga pengen brenti. Udah tuh perut pada klemekeran ampe duduk jadi serba salah.
Waya gini mah udah banyak nyeng jualin ikan oblok disunggalan warung nasi Betawi. Baek pagi-pagi maupun malem ari. Tetapi, kadang-kadang rasanya beda-beda. Ya, emang si beda tangan beda rasa.
Bini aye nyeng tadinya kaga bisa, sekarang mah pinter banget. Pan berguru ame nyak aya. Entuh elmu nyak aye turun semua ame bini aye. Ampir tiap sedara pada nyaba, pasti dioblokin. Saking sedepnya ade-adenya pada mesen. Pa lagi kalo aye ame bini ngelajo ke rumahnya, udah tuh sedara bilang”jangan lupa bawa oblok Mpok di mari.” Gelap-gelap buta bini udah getap ke pasar beli ikan nila/entog.
Ada nyeng lucu ame orang Betawi belah sonoan, pas lagi lamaran ke sedara diidangin oblok ama sayur bekasem. Besan pada melongo. Dalam ati mereka bilang “Gegaresan apa lagi eni, aneh….segejeg-gejeg kaga pernah gue liat,” pas besan gayemin ape kaga pada nyisah, cuman nyisain piring ama tesi. Nyeng lucunya minta dibungkusin pas pada pengen purik. Sedep banget rasanya katanya, udah kaga pake malu minta dibungkusin ame tuan rumah.
Dulu entog kaga dilirik ame orang, pas ikannya dirasa sedep harganya ngalahin daging sapi. Bahkan, waya gini banyak rumah makan nyeng nyediain khusus entog. Lucunya nyeng masih memeri baru mangkat gede udah dipotong, ikannya diburu orang banyak, katanya ikannya empuk.
Udah ntuh namanya macem-macem. Aye lupa namanya. Pernah suatu ari aye nyaba di rumah makan nyeng rade gedean. Pas diidangin aye kaget “lah, bujug eni mah memeri, pantesan empuk banget ampe ketulang-tulangnya.”
Pernah juga nyaba ke rumah makan di daerah Bekasi olahan bebek. Pas aye makan lah kaga nyamber pisan ikan ama sambelnya. Tapi banyak aje nyeng nyaba. Ikannya mah sedep, cuman kurang ngeklop aja, jadi ambyar aja rasanya
Nyeng jelas kalo nyak aye ama bini aye nyeng masak putus semuanya, hihihi….
Salam literasi
Salam Rempug ama guyub selalu
Cakung, 12 Juni 2022.
